| اسلام ٹائمز، حساس اداروں نے کارروائی کرکے سانحہ صفورا کے ایک اور اہم دہشتگرد کو گرفتار کرلیا۔ تفصلات کے مطابق حساس اداروں نے پپری کے علاقے میں کارروائی کرکے سانحہ صفورا کے ایک اور اہم دہشتگرد علی رحمان عرف لیوکین عرف چھوٹو کو گرفتار کر لیا۔ سانحہ صفورا بس حملے میں علی رحمان، اسامہ عالم اور حمزہ، حارث کے گروپ میں شامل تھے، علی رحمان موٹر سائیکل چلا رہا تھا، اس نے بس کے آگے موٹر سائیکل روکی، اور بس میں میں داخل ہوتے ہی آگے سے فائرنگ شروع کی، حملے کے بعد علی رحمان اور مستری پٹھان موٹر سائیکل پر فرار ہو گئے تھے۔ علی رحمان صفورا گوٹھ اسپارکو کا رہائشی تھا، اور حملے میں ملوث ایک اور دہشتگرد عمر جواد نے طاہر سائیں کی ملاقات علی رحمان سے کروائی تھی۔ ذرائع کا کہنا ہے کہ علی رحمان سعد عزیز عرف ٹن ٹن سے انگلش میں جہاد سے متعلق لٹریچر لکھواتا تھا۔ پولیس ذرائع کے مطابق گرفتار ملزم خاتون امریکی ڈاکٹر ڈیبرا لوگو اور سماجی خاتون رہنما سبین محمود کے قتل میں بھی ملوث ہے، اس کے علاوہ دہشتگرد نے 2014ء میں تیموریہ تھانے کی موبائل پر حملہ کیا، اور پاور ہاؤس چورنگی پر پولیس اہلکار کو قتل کیا تھا۔ واضح رہے کہ 14 مئی 2015ء کو صفورا گوٹھ میں اسماعیلی برادری کی بس پر حملے میں 43 افراد جاں بحق ہوئے تھے، جبکہ اس کیس میں ملوث مبینہ مالی معاونین سمیت متعدد دہشتگردوں کو گرفتار کیا جا چکا ہے، جن سے تحقیقات جاری ہیں۔ |  |
↧
سانحہ صفورا کا ایک اور اہم دہشتگرد علی رحمان عرف لیوکین گرفتار
↧