| اسلام ٹائمز۔ وفاق کے زیر انتظام قبائلی علاقے فاٹا کی کرم ایجنسی کے علاقے سرکئی میں نامعلوم مسلح دہشت گردوں نے 10 مزدوروں کو اغوا کرلیا ہے۔ سیکیورٹی اور پولیٹیکل انتظامیہ کے ذرائع کا کہنا ہے کہ مسلح دہشت گردوں نے سرکئی کے علاقے میں ایک پرائمری سکول پر حملہ کیا اور یومیہ مزدوری پر کام کرنے والے 10 مزدوروں کو اغوا کرلیا۔ ذرائع کے مطابق اغواء کیے جانے والے مزدور ایک زیر تعمیر سٹرک کی تکمیل کے لیے کام کررہے تھے اور رات میں اسکول میں قیام کیا کرتے تھے۔ پولیٹکل انتظامیہ کے ذرائع کا کہنا ہے کہ دہشت گردوں نے سکول کو تباہ کردیا ہے۔ خیال رہے کہ وفاق کے زیر انتظام علاقے فاٹا میں موجود کرم ایجنسی سمیت دیگر ایجنسیوں میں دہشت گردوں کی جانب سے گذشتہ کئی سالوں سے تعلیمی اداروں کو نشانہ بنایا جاتا رہا ہے۔ افغانستان سرحد کے قریب ہونے کی وجہ سے یہ علاقے دہشت گردی سے بہت زیادہ متاثر ہیں تاہم گذشتہ سال جون سے ملک بھر میں شروع ہونے والے فوجی آپریشن ضرب عضب، خیبر ون اور دیگر کے باعث یہاں دہشت گردی میں کافی حد تک کمی کا دعویٰ کیا جارہا ہے۔ حکام کے مطابق ان آپریشنز کے دوران دہشت گردوں کے اہم ٹھکانے ختم کردیئے گئے ہیں جبکہ سینکٹروں دہشت گردوں کو ہلاک اور گرفتار کیا جاچکا ہے۔ |  |
↧
کرم ایجنسی سے 10 مزدور اغوا
↧